92:1

وَاللَّيْلِ إِذَا يَغْشَىٰ

രാത്രി സാക്ഷി, അത് പ്രപഞ്ചത്തെ മൂടുമ്പോള്‍.

92:2

وَالنَّهَارِ إِذَا تَجَلَّىٰ

പകല്‍ സാക്ഷി, അത് തെളിയുമ്പോള്‍.

92:3

وَمَا خَلَقَ الذَّكَرَ وَالْأُنثَىٰ

ആണിനെയും പെണ്ണിനെയും സൃഷ്ടിച്ചതു സാക്ഷി.

92:4

إِنَّ سَعْيَكُمْ لَشَتَّىٰ

തീര്‍ച്ചയായും നിങ്ങളുടെ പ്രവര്‍ത്തനം പലവിധമാണ്.

92:5

فَأَمَّا مَنْ أَعْطَىٰ وَاتَّقَىٰ

അതിനാല്‍ ആര്‍ ദാനം നല്‍കുകയും ഭക്തനാവുകയും,

92:6

وَصَدَّقَ بِالْحُسْنَىٰ

അത്യുത്തമമായതിനെ സത്യപ്പെടുത്തുകയും ചെയ്യുന്നുവോ.

92:7

فَسَنُيَسِّرُهُ لِلْيُسْرَىٰ

അവനു നാം ഏറ്റം എളുപ്പമായതിലേക്ക് വഴിയൊരുക്കിക്കൊടുക്കും.

92:8

وَأَمَّا مَن بَخِلَ وَاسْتَغْنَىٰ

എന്നാല്‍ ആര്‍ പിശുക്കുകാണിക്കുകയും സ്വയം പൂര്‍ണതനടിക്കുകയും,

92:9

وَكَذَّبَ بِالْحُسْنَىٰ

അത്യുത്തമമായതിനെ തള്ളിപ്പറയുകയും ചെയ്യുന്നുവോ,

92:10

فَسَنُيَسِّرُهُ لِلْعُسْرَىٰ

അവനെ നാം ഏറ്റം ക്ളേശകരമായതില്‍ കൊണ്ടെത്തിക്കും.

92:11

وَمَا يُغْنِي عَنْهُ مَالُهُ إِذَا تَرَدَّىٰ

അവന്‍ നാശത്തിനിരയാകുമ്പോള്‍ അവന്റെ ധനം അവന്ന് ഉപകരിക്കുകയില്ല.

92:12

إِنَّ عَلَيْنَا لَلْهُدَىٰ

സംശയമില്ല; നാമാണ് നേര്‍വഴി കാണിച്ചു തരേണ്ടത്.

92:13

وَإِنَّ لَنَا لَلْآخِرَةَ وَالْأُولَىٰ

തീര്‍ച്ചയായും നമ്മുക്കുള്ളതാണ് പരലോകവും ഈ ലോകവും.

92:14

فَأَنذَرْتُكُمْ نَارًا تَلَظَّىٰ

അതിനാല്‍ കത്തിയെരിയും നരകത്തീയിനെക്കുറിച്ച് ഞാന്‍ നിങ്ങള്‍ക്ക് മുന്നറിയിപ്പ് നല്‍കിയിരിക്കുന്നു.

92:15

لَا يَصْلَاهَا إِلَّا الْأَشْقَى

പരമ നിര്‍ഭാഗ്യവാനല്ലാതെ അതില്‍ പ്രവേശിക്കുകയില്ല.

92:16

الَّذِي كَذَّبَ وَتَوَلَّىٰ

സത്യത്തെ തള്ളിക്കളഞ്ഞവനും അതില്‍നിന്ന് പിന്മാറിയവനുമാണവന്‍.

92:17

وَسَيُجَنَّبُهَا الْأَتْقَى

പരമഭക്തന്‍ അതില്‍നിന്ന് അകറ്റപ്പെടും.

92:18

الَّذِي يُؤْتِي مَالَهُ يَتَزَكَّىٰ

ധനം വ്യയം ചെയ്ത് വിശുദ്ധി വരിക്കുന്നവനാണവന്‍.

92:19

وَمَا لِأَحَدٍ عِندَهُ مِن نِّعْمَةٍ تُجْزَىٰ

പ്രത്യുപകാരം നല്‍കപ്പെടേണ്ട ഒരൌദാര്യവും അവന്റെ വശം ആര്‍ക്കുമില്ല.

92:20

إِلَّا ابْتِغَاءَ وَجْهِ رَبِّهِ الْأَعْلَىٰ

അത്യുന്നതനായ തന്റെ നാഥന്റെ പ്രീതിയെ സംബന്ധിച്ച പ്രതീക്ഷയല്ലാതെ.

92:21

وَلَسَوْفَ يَرْضَىٰ

വഴിയെ അയാള്‍ സംതൃപ്തനാകും; തീര്‍ച്ച.